اعتراف الشعر فيني يغني عن اي اعتراف
يكفي اني لا دعيته شفته يقبل يديه
الكتابه في الجرايد صورتي فوق الغلاف
ما خذت يوم اهتمامي لا ولا تطري عليه
مش غرور ولا تكبر واعترف مابه خلاف
بس شعري من كتبته ما اشوف الشعر زيه
وما ابي انشر حروفي في صحافة بف باف
وشلي بعدوى الذباب ان صار وانتقلت اليه
كل ما قلبت صفحه قال رايك قلت طاف
ما اشوف اللي يسر الخاطر ويجذب عينيه
بعضهم ينشر قصايد دون وزن ودون قاف
وان سئلته ليش تكسر قال تكفي الشاعريه
وبعضهم ينشر ويرجي نور وأريام وعفاف
يسئلونه كم رقمك لعنبو جده وحيه
وبعضهم ينشر فضايح فوق صدر وتحت هاف
دوم حول السر شعره لين تلقاه المنيه
وبعضهم ينشر ويشهر سيفه اللي ما يخاف
غايته تحطيم شاعر مبتدي لو بالأذيه
وبعضهم ينشر تحدي يحسب ان الاحتراف
في الإثاره والثواره وكسب جمهور البقيه
وبعضهم ينشر طلاسم فلسفه في الإلتفاف
ودايم المعنى في بطنه عمر ما ذا البطن عيه
وبعضهم يسترزق الله ما يبي غير الكفاف
يوم يمدح في الأمير ويوم يمدح في العطيه
وش اقول ووش اخلي حتى سايقنا مناف
قال بيتين فجنابي واسمعوا وش قال فيه
بابا خالد زين واجد يشتري واحد لحاف
يشتري واحد سرير ويشتري واحد زوليه
بابا كلش مافي يضرب كف ما يضرب كتاف
انا بابا يحب واجد بابا ماكو خربطيه
يا جنون الشعر حاسب ما بعد قلت انصراف
ما كتبتك من فراغ ولا تمنيتك مطيه
شي في قلبي وقلته واعتذر لو كانت جاف
بس حال الشعر والله ما يسر الأغلبيه
ليش ما نكتب قصايد في الجهاد اخر مطاف
ليش ما ننشر قيمنا في دساتير البريه
ليش ما نكتب قصايد في الهدى والانحراف
ليش ما نرسم ملامح ديننا السمح ونبيه
ليش والليشات كثر وزبدة الحكي اعتراف
ساحة الشعر فبلدنا للأسف ساحة غبية
ساحةٍ تفحر بنشر الموت والسم الزعاف
لا تظن ببكي عليها وادري ما تبكي عليه
تمت وخير القصايد ما انتهى في كل قاف
يذكر احمد من صباحه لين ما تمسى العشيه
